UM NÁMSKEIÐIN | Myjourney

UM NÁMSKEIÐIÐ Á BALÍ Í MAÍ 2025

Námskeiðin byggja á jógafræðunum, heilun & jákvæðri sálfræði

Öndun, hreyfingu í mýkt og mildi, slökun, núvitund, hugleiðslu og sjálfstyrkingu.

ÆFINGAR Í MÝKT OG MILDI

Æfingar verða bæði út frá jógafræðunum og orkufræðunum.

Æfingar í hugleiðslu, yin jóga, kundalini yoga og yoga nidra hjálpa viðkomandi að róa taugakerfið sitt ásamt því að styrkja og mýkja líkama sinn og róa um leið hugann með æfingum sem hafa sýnt fram á með ótal mörgum rannsóknum að hafi mjög jákvæð áhrif á huga, líkama og sál.

Einnig verða æfingar sem hreyfa við lífsorkunni og eru út frá orkulækningum, orkubrautum og Qi gong.

Á námskeiðinu verður:
* Yin jóga og hugleiðsla. Æfingar sem opna og mýkja bandvefinn í samræmi við líkamsástand hvers og eins.

*Jóga Nidra er sérstök tegund af leiddri hugleiðslu og er stundum kallað jógískur svefn. Markmiðið er að róa hugann og ná djúpri slökun í líkamann.

*Kundalini Yoga sem er jóga fyrir orkujöfnun og orkustöðvar. Tengir saman líkama og orkulíkama í djúpri hreyfihugleiðslu.

* Orkulækningar æfingarkerfi, Qi gong og somatic æfingar ásamt æfingum fyrir orkubrautirnar.

JÁKVÆÐ SÁLFRÆÐI & JÓGA

Á námskeiðinu verður farið yfir inngrip jákvæðrar sálfræði og unnin verkefni út frá þeim.
Jákvæð sálfræði inngrip hafa sýnt fram á að það sé hægt að hafa áhrif á líðan fólks með því að grípa inn í líf þeirra og gefa þeim færi á að virkja jákvæðar athafnir og hugsanir með sérstökum inngripum sem þróuð voru út frá rannsóknum jákvæðu sálfræðinnar á því hvað fær fólk til að blómstra. Til þess að einstaklingar, hópar, stofnanir og meðferðaraðilar geti nýtt sér þessar kenningar og rannsóknir jákvæðrar sálfræði koma til sögunnar svokölluð jákvæð inngrip. Jákvæð inngrip eru æfingar sem geta verið árangursríkar til að auka og viðhalda hamingju og jákvæðum tilfinningum, ásamt því að draga úr þunglyndi og kvíða.

Jákvæð inngrip eru góð viðbót við önnur meðferðarform en þeim er einungis ætlað að auka við eitthvað á jákvæðan hátt eins og hugarfar, hegðun eða tilfinningar en ekki að laga eða lækna geðsjúkdóma eða það sem er ábótavant í fari fólks. Þetta eru æfingar á borð við að greina styrkleika sína og nota þá markvisst, núvitundar og hugleiðsluæfingar, hreyfing, jóga, samkennd í eigin garð og ýmsar þakklætisæfingar. Jákvæð inngrip er eitthvað sem allir ættu að geta nýtt sér til að efla sína eigin velferð og til að hjálpa öðrum.

Jógafræðin bjóða upp á tengingu líkama, hugar og sálar sem er eitthvað sem nútíma maðurinn hefur ekki hugað nógu vel að. Hvernig líður mér í alvörunni í líkamanum, hvað er ég að finna og hvaða tilfinningar eru inn í mér.

Á námskeiðinu skoðum við mátt hugans, skoðum fókusinn okkar, stundum núvitund, eflum skynfærin, skoðum hvernig við tengjumst sjálfsmildinu og mýktinni, hver er ég, hvað þarf ég, hvað langar mig, hvert stefni ég.

ÖNDUN OG TÓNHEILUN

Öndun. Farið verður í ýmsar öndunaræfingar sem nýtast þátttakendum í daglegu lífi til að takast á við streitu, svefnvandamál og kvíða. Ásamt því að efla orku og bæta líðan.

Tónheilun. Í tónheilun hjálpa tónarnir og tíðnin huganum að ná slökun og gefa eftir. Orkusvið líkamans umbreytist og verður til þess að streita minnkar, vinnsla hefst á krónískum verkjum og ónæmiskerfið styrkist. Hlustandinn upplifir dýpra hugleiðsluástand og slökun.