Balí er einn af eftirsóttaverðustu áfangastöðunum fyrir þá sem langar til þess að hægja á, upplifa ævintýri innra með sér sem og töfrana sem að eru alltumlykjandi. Við höfum leitt vinsælar kvennaferðir til Bali og erum ofurspennt að bæta við þessari blönduðu ferð fyrir öll kyn 2024.  Í þessari ferð ætlum við að dekra við skynfærin, iðka jóga, hugrækt og fara í tónheilun, kynnast menningu Balíbúa og hrífandi náttúrunni. Við byrjum á því að dvelja í fjallabænum Ubud í fimm nætur en Ubud er þekktur fyrir sín fornu hof og grænu hlíðar, umvafinn fallegum skógi, plöntudýrð og hrísgrjóna ökrum. Við dveljum á dásamlegu fimm stjörnu heilsuhóteli í 5 nætur sem kúrir í útjaðri Ubud en á hótelinu er boðið upp á allskonar dekur til þess að rækta líkama og sál.  Við skellum okkur í dagsferð með Balenískum leiðsögumanni og fáum að kynnast menningu og siðum Balíbúa. Eftir himneska daga í Ubud keyrum við svo niður til Uluwata skagans þar sem við dveljum næstu fjórar nætur. Þessi syðsti skagi eyjunnar er þekktur fyrir sínar hvítu sandstrendur, dramatíska kalksteinakletta og dáleiðandi túrkísbláan sjó. Hér féll Julia Roberts kylliflöt fyrir braselíska sjarmatröllinu Javier og við erum viss um að þið eigið eftir að falla fyrir þessum einstaklega heillandi stað þar sem hægt er að upplifa fallegasta sólsetrið á Bali, njóta náttúrunnar eða rölta á milli veitingastaða og kaffihúsa. Hér gefst tími til þess að skipuleggja ferðir á eigin vegum og aðstoðum við gjarnan við það. Fyrir þá sem að vilja lengja ferðina og upplifa enn annað ævintýrið bjóðum við upp á þriggja nátta ferð til eyjunnar Gili Trawangan í um 1,5 tíma siglingu frá Balí. Gili er einstök upplifun sem við mælum svo sannalega með (sjá nánar um Gili hér neðar á síðunni)

 

JÓGA & HUGLEIÐSLA

​

​

 

Við byrjum dagana á jógaflæði með góðri slökun, hugleiðslu og valdeflandi æfingum sem þú getur svo tekið með þér út í lífið. 

Í eftirmiðdaginn er svo boðið upp á endurnærandi slökunaræfingar, hugleiðslu og/eða Yoga Nidra sem færir þér kyrrð, ró og vellíðan inn í kvöldið. 

Í dýrðlega fallegu umhverfi í sveitum Ubud og á Uluwatu skaganum, langt frá amstri hversdagsins gefum við okkur tíma og rúm til þess að slaka á og finna innri frið og ró. Við gerum núvitundaræfingar, iðkum orkujöfnun og dagbókarskrif og nærum þannig líkama, sál og huga. 

Allir jóga og hugleiðslu tímar fara fram á hótelunum sem við verðum á og eru fyrir byrjendur sem lengra komna. 

 Það geta allir iðkað j​óga!

 

Hér að neðan getið þið lesið betur um það sem er innifalið í ferðinni